مدبلجات بحرانية

موضوع: مدبلجات بحرانية 04/06/08, 10:14 am

مكي:أب للعائلة البسيطة مادياً اللي تتكون من7أشخاص عصبي شوي لكنه طيب ومتقاعد من زمان
زهرة: أم العيال وهي حنونة وطيبة
محمد:شاب متزوج وعنده ولد اسمه محمود عمره 4 سنين وعمر محمد 29 سنة
إبراهيم :عمره26سنة متدين ومايرضى بالمعاصي
حسين :شاب عمره22سنة عنيد وراسه يابس ومملوح شوي
حوراء: بنت حلوة مثل القمر رقيقة عمرها20سنة تتميز بالهدوء والخجل والنعومة وهذا اللي محليها تدرس في ثاني جامعة تموت في قصص الحب وفيها ملامح البراءة
زينب : بنت عمرها15سنة تعيش مراهقتها بشكل عادي وهي الدلوعة وملقوفة حيل
........................................ ...................
عائلة أحمد ,أبوهم ميت من 5سنين
فوزية(أم منصور ):الأم وهي على نياتها وطيبة
أماني: وهي البنت الكبرى وعمرها 26 سنة وعندها ولد أسمه حيدر عمره7سنين ومتزوجة من واحد أسمه علي ومتزوجتنه عن حب
منصور:شاب عمره20 سنة حساس حيل ويتأثر بسرعة
فاطمة:بنت عمرها19سنة في أولى جامعة أجتماعية وجريئة تدرس في نفس الجامعة اللي تدرس فيهاحوراء
يوسف :ولد عمره13 سنة دايماً يهزيء أخوه الكبير منصور, وفيه نبذة من الغباء
........................................ ....................
عائلة عبد الله(بوحنان):وهو الأب اللي مدلع بناته الثنتين ومتزوج ثنتين
نوال:وهي أمهم حشاشة ومتسلطة شوي ولعينة وعصبية
حنان: وهي البنت الكبرى عمرها23سنة ومتحررة
آلاء:عمرها21سنة بنت عادية مثل كل البنات تدرس في ثالث سنة جامعة
........................................ ................
عائلة يعقوب وهي تتكون من ثلاث أفراد بس:
يعقوب: وهو الأب ويدير شركة كبيرة في البحرين وعنده ولدين وهو سعودي الأصل.
حسان:شاب عمره22سنة رومانسي بشكل خيالي وحلو ووسيم حيييييل, كل البنات متهبلين فيه في الجامعة, وهو طايش ويحب البنات
سلمان:ولد عمره17سنة صايع شوي ومايشبه صفات اخوه فولا شي إلا الصياعة
........................................ ...............
نورة: صديقة حوراء بالجامعة مصادقتها من أيام الثانوي في توافق كبير بينها وبين حوراء
........................................ ............
أنيسة: وهي أم حسان وسلمان مطلقة من يعقوب ومتزوجة واحد ثاني وماعندها عيال منه ومتسلطة.
........................................ ............
هذي القصة رومانسية بشكل رهيب تتفجر فيها منابع الحب وفيها الجنون جنون الحب ..هذي القصة ما وضعتها تسلية القصة للأستفادة... واللي ينكتب فيها موجود كثير في مجتمعاتنا..وهذا موتخريب لكن هذا دليل على الحب الكبير اللي ماتشوهه أي علاقة ثانية ..دليل على أصرار الحب... هالقصة تقارن بين الحب القوي اللي مايفرقه شي والحب الضعيف اللي ينتهي بسهولة ..فراق..حزن..فرح..شوق..خداع..خيانة..
................................
مرة حبيتو؟واللا حسيتو بالحب؟..حسيتو باللي يحبون؟قدرتو شعورهم واحاسيسهم؟..عذرتوهم ؟ياترى هم قاسيين لمن يفارقونكم أقصد لمن تحبون؟..شنو الحب الحقيقي؟..وشنو الحب اللي يقوم على الكذب والخداع؟كل هالأجابات تلقونها في هالقصة
وأخليكم مع القصة
.....................................
الجزء الأول:
في قرية من قرى البحرين وتحديدا في سترة في بيت صغير بسيط رجعت حوراء من جامعتها بعدما انتهى
دوام الجامعة وشافت أمها قاعدة تطالع التلفزيون:
حوراء:السلام عليكم
الأم:وعليكم السلام...جيتيين
حوراء: أي جيت
وراحت حوراء فوق لحجرتها
ويوم دخلت لحجرتها شغلت اللمبات ورمت بكتبها على الطاولة وهي تقول:أوووووووووف وراحت للسرير وقعدت فيه وهي تفكر بحزن وتقول في قلبها: يا ربي ليش اني جدي ...أحس أني غير عن كل البنات اللي يسالفون ويضحكون وعندهم رفيقات وايد...وأنا بس رفيقة وحدة وشدراني أنها وفية بعد...ما ادري شالحياة التعيسة اللي أني عايشتنها....بس الحمد لله على كل حال.
........................................ ....................
نوال وهي قاعدة تتكلم بالتلفون وتضحك
نوال:...الحمد لله والشكر ماحد من عايلة مكي سنع مرة برهوه هالمتشدد على غفلة ولا سارة هذي الخبلة ولا حوراء اللي ملوعة جبدي بسكتتها وهي عقرب رمل وأمهم اللي تدافع عن عيالها ...مالت عليهم كلهم...
وشافت بنتها حنان نازلة من الدرج وتقوليها أمها :
نوال:وين رايحة؟
حنان :رايحة عند رفيقتي عازمتني عالغدا
نوال:أنزين يللا روحي بس لاتتأخرين انزين
حنان:أن شاء الله
ومشت عنها وهي كملت حجيها في التلفون إلي كله حش في حش >>> النسوان كله جديه خخخخخخ
نوال:....إي آسفة قاطعتش لان بتي حنان بتروح لرفيقتها.........وجت تسألني اروح لو ما اروح أماه قلت ليها روحي نفهي عن روحش شوية بدل هالحبسة في هالبيت اللي تضيق الصدر>>> حشاشة وشلاخة بعد
رفيقتها:نوال أنتبهي لبنتش ترى البنات هالأيام يسوون حركات جذي و جذي
نوال:لابنتي ماتسوي هالحركات لاتخافين أنا عارفة تربيتي زين
صديقة نوال:ألا تعالي شخبار ضرتش مرت رجلش الفانية
نوال:وييييييييي مالت عليها لاتذكريني فيها هذي اللهم يا كافي
صديقتها:ياحرام
نوال:بلا حرام بلا زفت هي دمرت حياتي لاوأكبر من رجلي بعد عجوز النار
........................................ .......
وفي بيت يعقوب(بو حسان) كان حسان في غرفته وهو منبطح على السرير ويكلم بنت
حسان:بالعكس أنا يوم عن يوم يزيد حبي لش...........ياعمري والله
ويدق الباب
حسان:لحظة...لحظة شوي...من؟
سلمان:أنا أنا سلمان
حسان:وشفيك
سلمان: أبي أكلمك بشي مهم
حسان: Ok باي حبيبتي أكلمش بعدين...يلا الله باي..........أدخل
سلمان يدخل للغرفة ويقعد على السرير اللي قاعد فيه حسان
سلمان:حسان أنا بصراحة أبي من عندك بيزات
حسان:بيزات!!ولويش ما تقول الى أبوي؟
سلمان:الله عاد أبوي ....هوخله يقعد ويانه عشان أطلب منه بيزات أبوي موحاس فينا أصلاً
حسان:وجم تبي؟
سلمان:أبي من عندك...200دينار بس
حسان بتعجب وهو يعدل قعدته:200دينار لاياحلو 200دينار واجد روح أطلبها من واحد فاني
سلمان:الله يخليك أنا أخوك
حسان:أنت وين تودي البيزات اب اعرف؟!
سلمان:يعني تدري الربع وجذي.ومصاريف المدرسة..أنت عطني البيزات وبس وبرجعهم ليك
حسان: اللحين احنا نقول مصاريف الجامعة وانت مصاريف المدرسة...موديل يديد والله ..أنزين بعطيك وبشوف آخرتها معاك ياسلمانوووووه
سلمان:أقول حسون
حسان:اييييييييه اللحين حسون نعم ويش تبي بعد؟؟
سلمان:لاولا شيء بس ما ودك تروح السعودية؟ ترجع لهلك وأحبابك
حسان:ليش من متى صار لنا أحباب هناك من أول مابلغت السنة واحنا هني ومانروح السعودية الا في الأعياد.... وبعدين الود ودي اروح السعودية اليوم قبل باجر
سلمان:الله لهل الكثر مشتاق ليها!
حسان:أكيد هذي بلدنا اللي تمشي في عروقنا ياكثر اني مشتاق لأرضها واهلها بس ابوي الله يهديه بعض الساعات يسوي حركات شباب ومراهقين.. واللا هذا شغل انه يتغرب عن أهله
سلمان:هههههه أقول اسكت لايسمعنا الحين
حسان:ياخي خله يسمعنا عشان يحس
سلمان :بس هذا شغل وهو مضطر
حسان:جا المحامي سلمان بن يعقوب
سلمان:حسون بقولك شي بس ماتزعل
حسان باستغراب:شنو!
سلمان:تصدق قلبك حجر والا أبوك مو مهتم انه يزعل والله لا
حسان:هاه أشوفك مصختها أقول روح وماراح أعطيك ولافلس
سلمان:لالالابليييييييييييييييييييز حسوني أنا أخوك الوحيد الحبوب
حسان يشوف اخوه من طرف عينه:والله تورطنا مع هالأخو المشكلة ماعندي غيرك
........................................ ...................
يتبع...

موضوع: رد: مدبلجات بحرانية 04/06/08, 10:15 am

وفي بيت أحمد بو منصور كان منصور قاعد يتطلع التلفزيون وهو منسدح ويقوم شوي ويقعد مكانه أخوه يوسف ويرجع منصور ويشوف يوسف قاعد مكانه
منصور: قوم هذا مكاني
يوسف:أقول روح بس
منصور:يوسفووووه قوم احسن ليك
يوسف: روح اذلف دور ليك مكان فاني لا و قاعد يهدد الحبيب بعد
وانسحب منصور من دون قوة وهو يتهدد في يوسفوووه
فاطمة وهي جاية ليهم:منصور وين أمي
منصور:وشدراني
فاطمة:يوسفوووه وين أمي
يوسف:مادري عنها
فاطمة تنادي أمها بصراخ:اماه...اماه
فوزية:نعم ها اماه ويش تبين؟؟؟
فاطمة:اماه وينش قاعدة أدورش من زمان
فوزية:عفر ويش تبين؟؟؟
فاطمة:ابغه تلفون
الأم:انزين ويش اسوي تدرين يا يمه احنا ما عنده بيزات
فاطمة:اماه الله يخليش الحين كل البنات اللي فعمري عندهم تلفونات وأني في أولى جامعة يعني لازم أشتري لي وااحد
الام:أن شاءالله يمه بشتريلش بس بعدين
فاطمة:وأبي تلفون جديد بوكاميرا طبعاً
منصور:بعد بوكاميرا!
فاطمة:أي مالك دخل
منصور:أقول لاتنفخين
فاطمة تعطي وجهها لأمها:ها اماه توعديني أنش تشترين لي تلفون؟
الام:أوعدش يايمه..لوكان أبوش هني كان ماقصر وياكم بس ماقول الا الله يرحمه
........................................ ...............
آلاء كانت تذاكر دروسها للجامعة ودخلت عليها أمها
نوال:ها آلاء يمه تراجعين؟
آلاء:أي
نوال:أيه صيري أحسن من أختش راجعي عدل عشان تجيبين مجموع عدل
آلاء:أن شاء الله
نوال:عسى الله يوفقكم ويخليكم لي يارب
حنان جات ليهم
حنان:ها...كني سمعت حش فيني
نوال(أم حنان):لاحش ولاشي أني أقول الصج لازم تراجع آلاء موتصير مفلش ماأمدى طلعتين من الجامعة على طول اشتغلتين حتى ماكملتين دراستش الجامعية
حنان:موأحسن أني أشتغل يعني!ولاحنا على زمان لوَل البنية لازم ينقعونها في البيت لين تموت من الملل ...الحياة حرية
نوال:أنتي الحجي ضايع وياش...أهو بس تباعدي( وطلعت نوال من الغرفة)
وحنان تسرع لأختها آلاء وتقعد على سريراختها
حنان:آلاء...آلاء واعدني
آلاء:من؟
حنان: مين بعد حسين ولد عمي
آلاء:صق حلفي؟!
حنان:أي والله العظيم (والضحكة شاقة وجهها)
آلاء:وين؟
حنان وهي متشققة من الوناسة :في المطعم وهذا أول موعد لينه
آلاء:أنا أول مرة أشوف علاقة تطول جذي معقولة5سنين وأنتي وياه وماحد يدري بعد!
حنان:لأن كل واحد منا أذكى من الثاني
آلاء:تحبين نفسش...المهم الساعة جم بتروحين ليه؟؟
حنان:قال لي الساعة10تكونين هناك
آلاء: يابختش لو زين أكون مفلش
حنان:أيه تذكرت أنش تتشفقين على الحب
آلاء: مافي أحلى من الحب
........................................ .........
حسين وهو طالع :اماه اماه
زهرة (أم محمد):نعم آمر
حسين:لابس أبي أقولش أني طالع يلا الله مع السلامة
الام:مع السلامة يمة
إبراهيم :هذا شسالفته من هو مراهق وهوكله جذي حاله ...طالع ...نايم...طالع...نايم
محمد:لاصق عمره ماقعد في البيت أنا أخاف أنسى شكله
الام:محمد..إبراهيم خلوه على راحته ماعليكم منه....شلون حمادي يامحمد
جت سارة الخبلة:اماه...اماه ... اماه
الأم:جت الخبلة نعم وشتبين؟
سارة:وين حوراء؟
الأم:فوق في حجرتها
سارة:وين حمودي؟
الأم:هناك وي أمه
سارة:اووووووووف كله وي أمه هالكريهة
زهرة(أم محمد):عيب عليش هالحجي هذي مرت أخوش
محمد:لا وتقول هالكلام قدامي جني مو موجود
........................................
ودخلت سارة حجرة حوراء وشافتها تقرا وهي قاعدة على الكرسي
سارة:ويش تقرين؟
حوراء:قصة رومانسية
سارة:أنا أكره شي عندي القراية مادري شتحبين فيها
حوراء:وشفيها القراية؟!هي اللي تثقفش وتعلمش
سارة:وقصص بعد الله يصبرش
حوراء بوناسة:القصص الرومانسية أحلى شي عندي بالدنيا
سارة:اللي يسمعش يقول أنش ملكة الحب يالمراهقة
حوراء:وانا من كبري يعني!توني في الـ20ومو شرط المراهق اللي يحب.. وبعدين المراهقة مو شرط تكون من13-18سنة فيه دخلوا الخمسين وللحين يراهقون
سارة:شي عجيب في هالدنيا!
حوراء:توش تدرين بهالشي!وفي أشياء أغرب وأغرب
........................................ ..........................
شنو اللي ينتظر حوراء؟
وهل راح ينكشف الحب اللي بين حنان وحسين؟
وحسان هل راح يحب حب حقيقي ولاراح يتم يقص على البنات؟
وشسبب نقل ابو حسان من السعودية للبحرين؟

موضوع: رد: مدبلجات بحرانية 04/06/08, 10:18 am

الجزء الثاني:
حسان وسلمان وهم نازلين يتعشون ويه أبوهم
بوحسان:سلمان شلون الدراسة عسى ماشية؟
سلمان:زينة يبه
بوحسان:وانت ياحسان شلون الجامعة معاك؟
حسان: زينة
بوحسان:هاحسان شد حيلك ترى هذي آخر سنة
حسان:هذي آخر سنة وأصعب سنة
يعقوب(بوحسان):ايه باين عليك انك ماتذاكر وتعبان تغذى زين
حسان:يبى.. أصلاً من طلقت أمي وانا حالتي موزينة
بوحسان وهو معصب:يعني تبي أرد لأمك عشان تمشيني على كيفها وتروح وتجي ولاكأني موجود!حامض على بوزك أنت وياه وبعدين شيايب موضوع أمك اللحين
ويقوم حسان وهو زعلان:أنا شبعت
ويمشي
سلمان:حسان انطرني لين اخلص لا تنسى اني بروح معاك
حسان:أنطرك بالسيارة ياذكي
سلمان:زين أنا يايك الحين
ويقوم سلمان :مع السلامة يبى
بوحسان:مع السلامة
وبو حسان قاعد يفكر ويقول في قلبه بعصبية وحرة: والله مادري شوراك ياحسون انت وامك ,انت ماتعرفها زين أنيسة غدرت فيني وخانتني كانت تبي الانسان اللي يناسبها آخر عمرها واللحين تزوجته وافتكيت منها وافتكت مني لكن لوتنطبق السما على الأرض ماراح ارد لها
.................
عايلة يعقوب(بوحسان)سعودية لاكنهم ساكنين في البحرين بسبب الشغل وهذي الأشياء تصير من واقعنا أما أنيسة(أم حسان) بحرينية وهي أول من أقنع زوجها أنهم ينتقلون للبحرين موبس للشغل ألا لانها بلدها وبوحسان ماصدق يبي يفتك من اهله بعدما قتل اخوه الكبير من دون ماحد يدري من قبل عشرين سنة بسبب الورث فقرر أنه يترك السعودية ويهاجر للبحرين بوحسان أنسان متسلط ومتكبر ويبي كل شي له
........................................ ..............
حسين يتصل على حنان وهو يركب السيارة
حنان وهي قاعدة تمشي بالسيارة واستانست يوم شافت الرقم
حنان:هذا حسين...ألو
حسين:هلا حبيبتي
حنان:هلا ياقلبي شحوال؟؟؟
حسين:الحمد لله بخير
حنان:وصلت المطعم؟
حسين:لاأنا توني راكب السيارة
حنان:يعني أنا بوصل قبلك؟!
حسين:أي حبيبتي ماعليه.. آسف تأخرت شويونه وبعدينويش فيها؟
حنان:ويشهذه اللي ويش شفيها المعروف أن الصبي يوصل للموعد قبل البنية مو البنية هي اللي توصل قبل!
حسين:أنتي حساسة وايد مو شرط,الحين أنا ياي بعد عشر ثواني عديهم ها
حنان:ههههههه ياحلاوتك ....المهم تعال بسرعة لاتتأخر زين؟!!
حسين:أن شاء لله ياقلبي يلا الله باي
حنان:بااااي
وتسكر حنان التلفون وهي مستانسة
حنان بنت جريئة تطلع بكامل المكياج وعندها حركات جذب والملابس كشخة
........................................ ................
حيدر وهو رايح لأمه: اماااااااااااااااااااااااااااه
أماني: ها اماه ويش فيك تصراخ جديه طيحت قلبي
حيدر:متملل أبي أطلع...متى بجي أبويييي ؟
أماني:أصبر الحين جاي...وتسمع صوت الباب كاهو جا
حيدر :يبه ...يبه
علي:هلا حبيبي
ويرن التلفون وترد أماني:ألو.......هلا اماه شحوالش؟
زهرة(أم أماني):وينكم يمه ليش ماتجونه أشوفكم قاطعين ياأماني
أماني:والله اماه هذاا شغل علي شسوي بعد ومانطلع إلا مرة في الأسبوع
الام:انزين تعالي بروحش أنتي وحيدر مافيها شي
أماني ارتبكت شوي:لا اماه علي ريلي مايرضى.........اماه بس خلاص منجيش الاسبوع الجاي........أن شاء الله.....يلا الله مع السلامة
وتصق التلفون وتقول لرجلها هذي أمي تسلم عليك
علي:الله يسلمها
حيدر:يلا يبه موطالعين
علي :يللا روح بدل فيابك
أماني:واني بروح ببدل فيابي بعد ويش مالي حق أطلع وياكم؟؟
........................................ ...........................
حوراء وهي نازلة من الدري وتشوف أبوها قاعد مكيف في الجو
حوراء:يبه..أمبه أطلع
أبو محمد:خلي حسين يطلعج
حوراء:أخاف مايرضى
ابو محمد:أنا بقول ليه
حوراء:مشكور يبه
الابو:الحين تبين تطلعين؟
حوراء:إيه
الابو:وهو ينادي :حسين...يا حسين
حسين نازل من الدرج :ها يبه ... آمر ويش بغيت؟؟؟
الابو:امباك اليوم تودي أختك حوراء السوق زين؟
حسين:ان شاء الله يبه
بومحمد:وبتروح وياش سويرة؟
حوراء:مادري يمكن
الابو يلف وجهه لحسين: سمعت يبه توديهم اليوم السوق
حسين:انت تأمر يا بو محمد ويبوس راس ابوه
بومحمد:يلا الله أنا بطلع شوية مع السلامة
حسين وحوراء:مع السلامة
وعقب ما طلع ابوهم تهاوشوا
حسين:الحين انا فاضي أوديش السوق!
حوراء:أي فاضي وش عندك يعني وبعدين من زمان ماطلعت أبي أطلع أجوف الناس..يمكن صارلي شهر ماطلعت حدك عيار توك تقول لابوي انت بس تامر يبو محمد> وهي تقلد صوته <
حسين:أنتون مشكلة يالبنات تروحون هالمجمعات عشان تبحلقون في هالشباب الصيع اللي أشكالهم (يضحك)..مخرعين مع هالشعور صرتو مفل الشباب هم يغازلونكم..وأنتون ..الحمدلله والشكر تغازلونهم
ويروح حسين لفوق
حوراء:وانتون بعد مشكلة يالشباب انتون اصلا سبب كل هالمشاكل
........................................ ................
منى وهي قاعدة تلاعب ولدها محمود وتجي حوراء
منى:هاحوراء شحوال؟
حوراء:الحمد لله بخير...الا قوليلي انتون وين رحتون؟؟؟
منى:رحنا نتمشى شوي وجينه...... عيل وين سارة؟
حوراء:سارة فوق بحجرتها...منى ممكن أسئلش سؤال؟
منى:تفضلي!
حوراء:انتي لويه متهاوشة وي سارة؟
منى:عاد انتين تعرفين اختش سارة عسرة شوي
حوراء:فيها قوة شخصية ولسان اللهم ياكافي يوم كنت كبرها ماكنت جذي أبد
منى:انا عارفتنش ماشاءلله عليش هادية ومسالمة
حوراء:خلف الله علينا ماعندنا لسان مفلها كل وحدة منا أهدى من الفانية
ويضحكون
حوراء: حمودي. شحوالات يا بعد قلب العمة؟
حمد:ذين عمو
حوراء:لا و يعرف يتحجى زين والله طالع شاطر على العمة
منى:أي وصل ال4 الحين
حوراء:ماشاء الله عليه
........................................ ........................
حنان وهي تطالع التلفزيون وجتها آلاء
آلاء:هاحنان شلون المقابلة وي حسين ويش قولي لي بسرعة؟
حنان:كان أحلى غدا..تصدقين هذا أحلى يوم بحياتي
آلاء:الله كل هذا حب؟!
حنان:وأكثر
آلاء:حنانو لوصاروعرفت أمي او ابوي شبتسوين؟
حنان:أهرب...أهج...أهاجر
ودخل بوحنان
عبد الله:السلام عليكم
حنان والاء:وعليكم السلام
بوحنان: شخباركم يابناتي الحلوات؟؟؟
حنان:طيبين أنت شلونك؟
عبد الله:لوني أبيض (ويضحكون)...سخيفة بس علي حلوة مدام انا قلتها(وكلهم ضحكوا)
عبد الله :يلا الله أنا رايح انام تصبحون على خير
حنان والاء:وانته من اهله يبه
حنان:لايكون أبوييي توه راد من عند مرته الخايسة
آلاء:أكيد ..أوووف ياكرهي ليها ما اطيقها يا ربي
حنان:لا عاد أني اللي أموت فيها
........................................ .............
واما حوراء وسارة وحسين فكانو يتمشون في المجمع ويروحون للمحلات
وتشوف حوراء مقابل وجهها شاب جذبها وهو كان مع ربعه وتطالع فيه وتقول لسارة:سارة شوفي هذا الصبي يخبل مو؟؟؟
سارة:أيهي انتين استحي على وجهش
حوراء:أبتسمت
وتبطىء سرعتها مع ان كان موجود اخوهم حسين قدامهم وانتبه لها هالشاب وهو حسان المعروف بين بنات الجامعة انه اللطيف لشدة رومانسيته وجاذبيته وحبه للبنات
وتمو يطالعون بعض لمدة طويلة واستحت حوراء والتفتت لشي ثاني وتلتفت له ويليتها مالتفتت لانه كان مبحلق عيونه عليها ولاراضي يشيلها....وبعدين حست انه يلاحقها مع انهم برفقة حسين...
حسان حلو ووسيم أبيض مووايد بياضه عادي شعره أسود وناعم وعيونه سودان وخشمه طويل كانه سلة سيف وحسان طويل وضعيف ملامحه ملامح سعودية لانه سعودي
أما حوراء فكانت فاتنة بيضة وبياضها صافي وشعرها أسود طويل وناعم عيونها كبار ولونهم بني غامق رشيقة وتناسب ان هي تكون عارضة أزياء وملامحها ملامح طفولة وبراءة وواجد ناعمة
حوراء تقول لسارة:شفيه هذا يلاحقني من مكان لمكان أني خايفة
سارة :من حلاوتش عاد
حوراء :لا الموضوع جد عاد انتي اللي مذوبة الشباب أنا للحين مدري جم واحد تغزل فيني من كفرهم......وتلتفت لحسين:حسين امبه اروح الحمام
حسين:انزين بوصلكم للحمام وبتمشى وبرجع ليكم..........ويروحون للحمام وحسان وراهم وكانت حوراء بتدخل وحست انه يلاحقها...فجأة يطلع الرقم ويعطيها الرقم ويقول حسان:أتصلي فيني باجر الساعة 9 لاتنسين
حوراء بخوف....ووو..وشتمبه مني ؟
حسان بابتسامة:كل الخير لاتخافين مني ويمشي حسان عنهم
...وكانت حوراء ميتة خوف وتحط الرقم في الشنطة ...سارة:مينونة أنتين ترى بقول لابويييي.....حوراء:لا الله يخليش لاتقولين ليه انزين سارة يا الله عاد عشان خاطر اختش.....
سارة :انزين انزين .....دشي بس دشي فشلتينه (ودخلو الحمام)
........................................ .............
ياترى شراح يصير لحوراء بعد ماعطاها حسان الرقم ؟
ولين متى راح تتم علاقة حسين وحنان؟
وهل راح تتصل حوراء في حسان وهل راح تصير بينهم علاقة حب؟

موضوع: رد: مدبلجات بحرانية 04/06/08, 10:23 am

الجزء الثالث:
فاطمة وهي جاية:اماه..اماه
الام:نعم
فاطمة:اماه باركيلي اشتريت تلفون
الام:مبروك يا يمة....با جوفه
منصور:هههههههههههه تلفوني أحسن هههههههههههههههههههه
فاطمة:أسكت بس أدري انك تغار مني
وراح منصور لحجرته وهو يتحمد ربه ويضحك على أخته على عقلها وخبالتها هههههههههه
فاطمة:يجنن اماه مو؟؟؟
........................................ .................................
حسان وهو قاعد في غرفته وسرحان بجمال ونعومة حوراء ويقول في قلبه:
الله ويش هالبنية الحليوة القمروناعمة وااااااااااجد.ويرن تلفونه ويشوف متصلة عليه أفنان حبيبته
حسان:أوووووووووه ويش تبي هذي الحين....(ويرد)ألو
أفنان:ألو هلا حسان شلونك؟؟
حسان بدون خلق:هلا أفنان..نعم ويش تبين؟؟؟
أفنان:شنو شتبين ليش تكلمني بهالطريقة وبعدين ليش كل ماأتصل فيك مقفل جهازك؟؟
حسان:مافيني شي بس تعبان الحين وأبغي أنام يلا الله باي
أفنان:ألو...ألو...هين ياحسان تسكر الخط بويهي!
........................................ ..........................
حوراء وهي في بحر من الأفكار وهي لابسة جلابيتها ومطفية الليتات ومشغلة الأباجورة وقاعدة على السرير وتفكر وتقول في قلبها:
ياترى ويس يبي هذا مني رغم طيشه الا اني احس انه جذبني لا يقص عليييي.. بس. وتقوم وتمشط شعرها الحريري الواصل لين ظهرها الأسود وتبتسم ابتسامة حليوة وهي كأنها صايرة ملاكوجت أختها سارة للحجرة
سارة:حور.....
حوراء:بسم الله.....أوووووف نعم ويش تبين؟؟؟
سارة بصوت واطي:أتصلتين للصبي اللي عطاش الرقم؟
حوراء: أولاً مالش دخل فانياً هو قال باجر فالفاً لاتعلمين أحد
سارة:لابعلم ياحلاوتش... تاخذين رقم الصبي وهو خلط وتبينيي اسكت وما اقول لاحد تحلمين
حوراء:سارة اني بنية عمري عشرين يعني مو مراهقة
سارة:وانتين الصادقة صايعة
حوراء:فيه أحد أصيع منش
سارة:أني!!!! ليش ويش مسوية عفر انتين تعرفينه واني ما اعرفه؟!
حوراء:أقول روحي ترى مالي خلقش ياسوير
سارة:عيل بعلم
حوراء:خلاص خلاص هونااااا وجع ..بس ترى أنتي صغيرة وماتفهمين لها الأشياء ..
سارة:أنا أفهم أكفر منش
حوراء:أقول روحي بس
........................................ ...........
علي وحيدر وأماني وهم راجعين من برة
أماني:هاحبيبي حيدر أستانست؟
حيدر:أستانست وايد
علي:يلاالله الحين روح نام باجر وراك مدرسة
حيدر:أن شاء الله
وراح حيدر فوق ينام
أماني:علي..باجر امباك توديني بيت أبوي امبا أجوف أمي من زمان ماجفتها
علي: متى أوديش؟
أماني: ممممممم.. العصر
علي:انزين وانتي بعد روحي نامي الحين والله نسيتين انش مدرسة
أماني: جنها طردة
علي :يمكن جذي! هههههههههههههههههههه
........................................ ......
في بيت يعقوب(بوحسان)تنزل من السيارة مرة في الأربعينات وترن الجرس وكان بوحسان قاعد في الصالة وتفتح الخدامة الباب
أنيسة:موجود بابا هني
الخدامة:أي ماما في موجود
وتدخل أنيسة(أم حسان) للصالة وتشوف طليقها يعقوب
أنيسة بعبوس:السلام عليكم
يعقوب بتفاجئ:وعليكم السلام....أنتي شيايبج هني
أنيسة:هذا بدل ماتقول تفضلي
يعقوب:تفضلي...(وجلسو)ها شتبين طلاق وتطلقنا ويش عندش
أنيسة:مافي داعي نفتح هالمواضيع القديمة مرة ثانية وبعدين أنا موياية عشانك أنا ياية أشوف عيالي
يعقوب:عيالش؟!اللحين صارو عيالش بعد ماعذبتي أبوهم اللي هو أنا!
أنيسة:تبي ترجع السعودية أرجع أنا طليقتك الحين
يعقوب:ههههههههه تحسبيني ياي هني وساكن هني عشانش لا أنا عشان أتبع رزقي جيت اهني
أنيسة:وين عيالي؟
يعقوب:أنتين ماعندش عيال تتخلين عنهم طول هالوقت ولا كانهم عيالش والحين جاية تسالين عنهم؟؟؟
أنيسة:مومن حقك تحرمني من عيالي وينهم أبغي أشوفهم
يعقوب بصراخ:أنيسة ردي مكان ماجيتين
أنيسة:أنا ماراح أطلع ألا لين أشوف عيالي (وتناديهم)حسان.......سلمان
ونزلو العيال
حسان وسلمان بتعجب:يمى!!!!!!!!
ويروح سلمان لأمه :يمى شحوالش؟؟
أنيسة:الحمد لله ياعمري بخير
وتلف وجهها لولدها حسان:ها شلونك حسان عساك مرتاح
حسان بتكبر وفنفس الوقت بزعل:الحمد الله أنا بخير
أم حسان:حسان...شفيك؟
حسان:مافيني شي
ويروح فوق لغرفته وهو ماله خلق للدنيا كلها
أنيسة:بوحسان شفيه ولدي أنت مزعلنه
بوحسان باستهزاء:لا أكيد منش
أم حسان: انا ويش سويت؟
بوحسان:هاملة عيالش وهادتهم وشلون ماتبينه يزعل
أم حسان:لامو عشان جذي لأن حسان نسخة من ابوه قلبه قاسي مثلك ولدي واعرفه زين
بوحسان طنشها وماتكلم
أنيسة:سلمان يمة أهتم بنفسك زين؟
سلمان:ان شاء الله يمه
أنيسة:يلا الله مع السلامة
سلمان:مع السلامة
ويطالع سلمان أبوه بنظرات وبوحسان واقف ويطالعه ولاهمه ويروح سلمان لفوق
........................................ ..........................
حوراء تتصل في نورة
نورة:ألو
حوراء:ألو
نورة:هلا هلا والله
حوراء:شحوالش شخبارش
نورة:أنا الحمد لله بخير أنتي شلونج
حوراء:تمام...تعالي أنتين لويش ماتتصلين هالأيام
نورة:انه تعبانة ومالي خلق الجامعة والله تعبنا
حوراء:يعني لوماتصلت انجان حقرتيني
نورة:لا شدعوة ماقلت جذي
حوراء:المهم مادريتين ويش صار اليوم!
نورة:اشصار؟
حوراء:شي كبير واجد ولاتزعلين مني لين قلته
نورة:يعني عن شنو
حوراء :أني اليوم رحت أني وأختي وأخوي مجمع و....تعرفين يعني الشباب واجد
نورة:أعرف شنو...اها قصدج المغازلجية
حوراء:أي هذي مايبيلها تفكير
نورة:شلون ومعاج أخوج؟
حوراء:لاتستعيلين... بس اللي قط علي الرقم يانورة حليييييييييييييييييييو يدبح
نورة:!والمسألة فيها رقم...ها شسالفة حوروه
حوراء:صبري باقول ليش السالفة بس ها مو تعلمين احد يا الخبلة
نورة:بس تعالي تصدقين غريبة مارديتي عليه.. أنا اللي أعرفه أن من يجي واحد يغازل تتجرأين وتهزأينه
حوراء بضحكة:ياحلوة ترى أنا بعض الأحيان ماأقدر أتكلم من الخوف وبعض الأحيان ودي أطلع حرتي فيهم واشرشحهم هالشباب الصيع
نورة:ههههه..المهم قولي السالفة

........................................ ..................
انتهى الجزء الثالث وسوري لانه قصير لكن الجزء الرابع راح يصير أطول إذا تفاعلتو ن وياي وآسفة بعد لأن هالجزء مافيه شي من الرومانسية

هل راح تتصل حوراء في حسان؟
وهل راح يظل حسان شاب طايش ؟
وهل راح ينحرمون حسان وسلمان من شوفة أمهم وحتى بلدهم طول عمرهم؟

» مدبلجات بحرانية
» الان (نكت بحرانية) من كل قرية
» قصة عامية بحرانية, أحمدوو بطلها
» كُـلْ المُــنى أنتِ "لهجة بحرانية"